yaad hai ab tak mujhe ahd-e-javani yaad hai
dil ke basne aur ujadne ki kahani yaad hai
yaad hai ab tak kisi ki mehrbani yaad hai
arizon par apne ashkon ki ravani yaad hai
bistar-e-hirman pe vo pahlu badalna baar baar
gham ki raton men vo qahr-e-asmani yaad hai
ruthne aur ruuth kar manne ke har andaz ki
mehrbani yaad hai na-mehrbani yaad hai
yaad hai ab tak mujhe vo alam-e-guft-o-shunid
ru-ba-ru-e-dost paigham-e-zabani yaad hai
yaad hai ab tak tire maktub-e-rangin ki bahar
saada saada kaghazon par gul-fishani yaad hai
baar baar uthna sar-e-mahfil nigah-e-naz ka
gardish-e-jam-e-sharab-e-arghavani yaad hai
qurb ki ghadiyon men gaahe hijr ke lamhat men
kamrani yaad hai na-kamrani yaad hai
bargah-e-husn men ai ‘barq’ fart-e-roab se
yaad hai ab tak vo apni be-zabani yaad hai