dasht mar.ub hai kitna miri virani se
munh taka karta hai har dam mira hairani se
log dariyaon pe kyuun jaan diye dete hain
tishnagi ka to ta.alluq hi nahin paani se
ab kisi bhaav nahin milta ḳharidar koi
gir ga.i hai miri qimat miri arzani se
ḳhud pe sau jabr kiye dil ko bahut samjhaya
raas aa.i kahan duniya hamen asani se
ab ye samjhe ki andhera bhi zaruri shai hai
bujh ga.iin ankhen ujalon ki faravani se
ajnabi ahaTen anjan sada.en mujh men
main to baaz aaya ḳharabe ki nigahbani se
aa gaya kaun ye aaj us ke muqabil ‘aslam’
a.ina TuuT gaya aks ki tabani se
Leave a Reply