Ye Mohabbat Agar Zarurat Hai

Aks Samastipuri

ye mohabbat agar zarurat hai

ye zarurat bhi to mohabbat hai

mera bhi dil nahin tha rukne ka

us ne bhi kah diya ijazat hai

sha.iron ki nazar se mat dekho

duniya dar-asl ḳhubsurat hai

tum mujhe chhoḌ kar chale jaao

meri qurbat agar musibat hai

lauT aaya mira akela-pan

ab kisi ki kahan zarurat hai

‘aks’ behad nasib vaale ho

tum ko marne ki bhi suhulat hai