teri nigah-e-lutf bhi nakam hi na ho
dil to vo zaḳhm hai jise aram hi na ho
chaunka huun nim-shab bhi yahi soch soch kar
vo aftab ab bhi lab-e-bam hi na ho
tum jis ko jante ho faqat apni tab-e-ḳhas
vo ranj vo fasurda-dili aam hi na ho
ahista is larazte hue pul pe rakh qadam
sadiyon ka inhidam tire naam hi na ho
ai dil mafar to kar-e-jahan se nahin magar
itna to kar ki is men subuk-gam hi na ho
dastak si de rahi hai dariche pe bad-e-sub.h
ai mahv-e-ḳhvab sun koi paigham hi na ho
‘ḳhurshid’ tu ne kaise nibha.in ye uzlaten
jaise tujhe kisi se koi kaam hi na ho
Leave a Reply