hamari aql-e-be-tadbir par tadbir hansti hai
agar tadbir ham karte hain to taqdir hansti hai
asiron ka nahin kuchh shor-o-ghul ye aaj zindan men
mire divana-pan ko dekh kar zanjir hansti hai
kabhu pahunchi na is ke dil talak rah hi men thak baiThi
baja us ah-e-be-tasir par tasir hansti hai
tu surat us ki kya khinga apni dekh to surat
musavvir is tiri tasvir par tasvir hansti hai
vahi hai mard jo ho ru-ba-ru tarvar ke ‘hatim’
ki munh ke pherte namard par shamshir hansti hai
Leave a Reply