na.e paikar na.e sanche men Dhalna chahta huun main
mizaj-e-zindagi yaksar badalna chahta huun main
zamin teri kashish ne rok rakkha hai mujhe varna
hudud-e-ḳhak se bahar nikalna chahta huun main
numu ka josh Thokar marta rahta hai siine men
lahu ka chashma huun kab se ubalna chahta huun main
guzarte ja rahe hain qafile tu hi zara ruk ja
ghubar-e-rah tere saath chalna chahta huun main
main apne barf ke paikar se ḳhud ukta gaya huun ab
chamak mujh par mire suraj pighalna chahta huun men
sada.en dasht deta hai mujhe vahshat bulati hai
so ḳhak-e-ishq apne sar pe malna chahta huun main
idhar se bhi koi guzre ki main jis se kahun ‘aslam’
charagh-e-rahguzar huun aur jalna chahta huun main
Leave a Reply