bazm-e-alam men sada ham bhi nahin tum bhi nahin
munkir-e-roz-e-jaza tum bhi nahin ham bhi nahin
sar-phiri tund hava ham bhi nahin tum bhi nahin
mulk-dushman ba-ḳhuda ham bhi nahin tum bhi nahin
kis ke iima pe hai ye ḳhun-ḳharaba ye fasad
qa.il-e-jaur-o-jafa ham bhi nahin tum bhi nahin
jaan aapas ki bura.i men ganva den apni
is qadar ḳhud se ḳhafa ham bhi nahin tum bhi nahin
ham ko dastur ne baḳhshe hain barabar ke huquq
koi kamtar na siva ham bhi nahin tum bhi nahin
jazb hai ḳhak-e-vatan men jo buzurgon ka lahu
is ki miTTi se juda ham bhi nahin tum bhi nahin
Leave a Reply