Hai Bhi Aur Phir Nazar Nahin Aati

hai bhī aur phir nazar nahīñ aatī

dhyān meñ vo kamar nahīñ aatī

muḳhtasar hāl-e-dard-e-dil ye hai

maut ai chāra-gar nahīñ aatī

niiñd kā kaam garche aanā hai

merī āñkhoñ meñ par nahīñ aatī

be-tarah paḌtī hai nazar un kī

ḳhair dil kī nazar nahīñ aatī

jaan denī to ham ko aatī hai

dil ko taskīn agar nahīñ aatī

un kā aanā to ek aanā hai

maut bhī vaqt par nahīñ aatī

‘anvar’ is shab kī dekh lo tāḳhīr

sub.h hotī nazar nahīñ aatī

Leave a Comment