ye kaisa shahr hai main kis aja.ib-ghar men rahta huun
main kis ki aankh ka paani huun kis patthar men rahta huun
vo ḳhushbu is ta.alluq se bahut bechain si hogi
main kanTa tha magar ik phuul ke bistar men rahta huun
use ik din yahi ḳhana-badoshi ḳhud bata.egi
main apne ghar men rahta huun ki us ke ghar men rahta huun
agar mohlat mile to qatilan-e-shahr se puchhun
main kis ki jaan huun kyuun sina-e-ḳhanjar men rahta huun
mujhe ye be-panahi kab tira rasta dikha.egi
tiri avaz huun aur gumbad-e-be-dar men rahta huun
ye sab ḳhush-posh chehre ho chuke hain munkashif mujh par
main un ke darmiyan kyuun jama-e-mahshar men rahta huun
ḳhudi kya chiiz hai ‘ḳhurshid-akbar’ aur ḳhuda kya hai
kahun main kis zaban se dast-e-ahan-gar men rahta huun
Leave a Reply