Uske Chehre Pe Tabassum Ki Ziya Aaegi

us ke chehre pe tabassum ki ziya aaegi

vo mujhe yaad karega to haya aaegi

odh kar jism pe yadon ki rida aaegi

jab bhi maazi ke jharokon se hava aaegi

kaun mazlum ki fariyad sunega na-haq

laut kar dasht men ḳhud apni sada aaegi

kis qadar bikhra hua huun main bichhad ke tujh se

yaad ab kis ki mujhe tere siva aaegi

band kamron men kisi ko bhi ye ehsas na tha

dar khulenge to bahut tez hava aaegi

ghair-manus fazaon men to ḳhush huun lekin

jaane kis mod pe manus faza aaegi

naam to apna gunahgaron ki fihrist men likh

tere hisse men bhi rangin qaba aaegi

zindagi sab se juda guzregi apni ‘anjum’

maut bhi aai to vo sab se juda aaegi

Leave a Comment