pahunch ke ham sar-e-manzil jinhen bhula na sake
vo ham-safar the jo kuchh duur saath aa na sake
tamam umr pashemaniyon men biit ga.i
ba-qadr-e-shauq mohabbat ke naaz uTha na sake
mujhe ḳhayal hai un dil-girafta kaliyon ka
jinhen nasim-e-sahar chheḌ de khila na sake
kuchh aise dard bhi hain zindagi ki rahon men
jahan hijab-e-tabassum bhi kaam aa na sake
karam ki aas ke sayon men bujh gaya vo charagh
hava-e-yas ke jhonke jise bujha na sake
andheri shab thi sitaron se kya sukun milta
sitare bhi to bahut der jagmaga na sake
ghazal ke husn ka ehsas us ko kya ‘javed’
ḳhulus-e-narmi-e-guftar ko jo pa na sake
Leave a Reply