Nazeer Banarasi
ye jalva-e-gah-e-ḳhas hai kuchh aam nahin hai
kamzor nigahon ka yahan kaam nahin hai
jis men na chamakte hon mohabbat ke sitare
vo shaam agar hai to miri shaam nahin hai
kya jaane mohabbat ki hai ye kaun si manzil
vo saath hain phir bhi mujhe aram nahin hai
tum samne ḳhud aa.e navazish ye tumhari
ab meri nazar par koi ilzam nahin hai
afsos vo kab meri nazar dekh rahe hain
jab meri nazar men koi paigham nahin hai
shayad ki ‘nazir’ uTh chuka ab dil ka janaza
ab saans ke pardon men vo kohram nahin hai
Leave a Reply