Poet
gardish-e-jam bhi hai raqs bhi hai saaz bhi hai
jis men naghmon ka talatum hai vo avaz bhi hai
itna saada bhi use ai dil-e-pur-shauq na jaan
iltifat ek nigah-e-ghalat-andaz bhi hai
mudda.a un ka samajh men nahin aata ai dil
be-sabab hai ye taghaful ki koi raaz bhi hai
gharq-e-kaifiyat-e-ahang-e-tarab sun to sahi
zindagi dard men Duubi hui avaz bhi hai
toḌ Dalenge qafas aaj asiran-e-qafas
azm-e-parvaz bhi hai quvvat-e-parvaz bhi hai
meri ankhon se Dhalakte hue har ashk men aaj
aks-e-anjam bhi hai surat-e-aghaz bhi hai
kaun jaane ye mire dil ke siva ai ‘muztar’
us ki ik jumbish-e-lab silsila-e-raz bhi hai
Leave a Reply