jis ko chaha tha na paaya jo na chaha tha mila
baḳhshishen hain be-hisab us ki hamen kya kya mila
ajnabi chehron men phir ik ashna chehra mila
phir mujhe us ke ta.alluq se pata apna mila
is chaman men phuul ki surat raha main chak-dil
is chaman men shabnam-asa main sada pyasa mila
phir qadam uThne lage hain shahr-e-na-pursan ki samt
mere pa-e-shauq ko to ek hi rasta mila
dekh kar us ko bhala phir kis ko dekha jaa.e hai
majma-e-aghyar men bhi us se main tanha mila
yuun hua ruḳhsat rahi baaqi na milne ki umiid
yuun mila vo jaise muddat ka koi bichhḌa mila
Leave a Reply