na.i na.i suraten badan par ujalta huun
lahu se kaise ajiib manzar nikalta huun
vo dil men utren to ek ho jaa.en raushni den
dhanak ke rangon ko apni ankhon men Dalta huun
zamin talvon se aa chimaTti hai aag ban kar
hatheliyon par jab asman ko sambhalta huun
hava men thoḌa sa rang utre so is liye main
gulab ki pattiyan faza men uchhalta huun
koi nahin tha jo is musalsal sada ko sunta
ye main huun jo is diye ko suraj men Dhalta huun
‘tarir’ sanson ka rang niila hua to jaana
ḳhabar nahin thi ye saanp hain jin ko palta huun
Leave a Reply