na sirf ye ki sabhi gul-badan darida rahe
hamare haal pe patthar bhi abdida rahe
usi zamane men fan par nikhar bhi aaya
vo jis zamane men ham se bahut kashida rahe
unhin ne vaqt ke chehre ko tabnaki di
jo log vaqt ke hathon sitam-rasida rahe
ham ek qissa-e-andoh-o-yas the lekin
sama.aton ke nagar men bhi na-shunida rahe
kuchh is tarah se raha huun main teri mahfil men
ki jaise mahngi kitabon men ik jarida rahe
har ek daur men sach bolte rahe ham log
har ek daur men ham log sar-burida rahe
koi bhi zahr unhen kya halak kar paata
jo teri bazm men tere karam-gazida rahe
chaman ko baḳhsh di ham ne qaba-e-gul ‘sha.ir’
ba-faiz-e-dast-e-junun ham qaba-darida rahe
Leave a Reply