Afzal Gauhar Rao
shikast kha ke bhi kab hausle hain kam mere
mire kate hue hathon men hain alam mere
panah-gah mujhe bhi to saur jaisi de
miri talash men dushman hain taza-dam mere
tujhe main kaise bataun kahan se kaisa huun
ulajh rahe hain ba-dastur pech-o-kham mere
kis asman ki vusat talash karte hue
zamin se duur nikal aae hain qadam mere
tu ye saval bhi ab dajla o furat se puchh
main kya bataun kahan lut gae haram mere
jami rahi hai chatanon pe barf sadiyon tak
to ja ke phir kahin patthar hue hain nam mere
Leave a Reply