Ravish Siddiqi
ek laghzish men dar-e-pir-e-mughan tak pahunche
ham bhaTakte the kahan aur kahan tak pahunche
lutf to jab hai ki ai mahram-e-husn-e-guftar
ho koi baat magar husn-e-butan tak pahunche
ye bhi kuchh kam nahin ai rah-rav-e-iqlim-e-yaqin
ham ḳharabat-nashin husn-e-guman tak pahunche
tai hui manzil-e-ḳhara-shikani do din men
log sadiyon men dil-e-shishagaran tak pahunche
zauq-e-shirini-e-guftar fuzun aur hua
zahr jitne the vo sab ahl-e-zaban tak pahunche
vo kahan dard jo dil men tire mahdud raha
dard vo hai jo dil-e-kaun-o-makan tak pahunche
aag bhaḌki hai to ab kaun ye kah sakta hai
shola-e-daman-e-tahzib kahan tak pahunche
mavara lafz o bayan se hai vo husn-e-azali
kam-nazar marhala-e-lafz-o-bayan tak pahunche
faiz-e-mehrab-e-ghazal hai ki ‘ravish’ ahl-e-nazar
husn-o-rana.i-e-andaz-e-bayan tak pahunche
Leave a Reply