haath aata to nahin kuchh pa taqaza kar aa.en
aur ik baar gali ka tiri phera kar aa.en
niind ke vaste vaise bhi zaruri hai thakan
pyaas bhaḌka.en kisi saa.e ka pichha kar aa.en
lutf deti hai masiha.i par itna bhi nahin
josh men apne hi bimar ko achchha kar aa.en
log mahfil men bulate hue katrate the
ab nahin dhaḌka ye ḳhud se ki kahan kya kar aa.en
kaash mil jaa.e kahin phir vahi a.ina-sifat
naqsh be-rabt bahut hain inhen chehra kar aa.en
kitni asani se ham us ko bhula sakte hain
bas kisi tarah use dusron jaisa kar aa.en
ye bhi mumkin hai ki ham haar se bachne ke liye
apne dushman ke kisi vaar men hissa kar aa.en
baat maazi ko alag rakh ke bhi ho sakti hai
ab jo halat hain un par kabhi charcha kar aa.en
ye bata kar ki ye raunaq to zara der ki hai
sahib-e-bazm ke haijan ko ThanDa kar aa.en
kya vajud us ka agar koi tavajjoh hi na de
ham ki jab chahen use bhiiḌ ka hissa kar aa.en
Leave a Reply