poet

Garmi Mere Kyun Na Ho Sukhan Mein

garmi mire kyuun na ho sukhan men

ik aag si phunk rahi hai tan men

vo rashk-e-gul aae gar pas-az-marg

phula na samaun main kafan men

hushyari men kab hai aisi lazzat

jo kuchh hai maza divana-pan men

khvari ka miri vo lutf samjhe

kamil ho jo ashiqi ke fan men

gardish jinhen misl-e-asiya hai

daaim unhen hai safar vatan men

naseh main rafu ko tab kahun aah

halat ho jo kuchh bhi pairahan men

ai bad-e-khizan vo kya hue gul

khaak udne lagi hai kyuun chaman men

betabi-e-dil kare hai rusva

kya jaiye us ki anjuman men

hai tira hi dhyan aur kuchh ab

baaqi nahin tere khasta-tan men

jald us ko dikha de shakl ai jaan

rah jaegi varna man ki man men

ghar men jo nahin vo yaar ‘jurat’

ghabrae hai apni jaan tan men

hai ji men ki khana kar ke viran

ja baithiye ik ujaad ban men

More Poems

Leave a Comment