Mannan Bijnori
quvvat-e-jaur jaa.e chhin tujh se jo tu jafa kare
tu bhi ho be-bas ek din aisa bhi ho ḳhuda kare
chheḌe koi jo gham ki baat tera bhi jaa.e dil pe haath
siine men dhaḌkanon ke saath tiir sa kuchh chubha kare
tere bhi honT jaa.en sil tu bhi kabhi ho munfa.il
ruḳh pe baras ke abr-e-dil qissa-e-dil kaha kare
atish-e-shauq ho na kam baḌhti hi jaa.e dam-ba-dam
lazzat-e-dilbari se gham tujh ko bhi ashna kare
ul-julul bak gaya tujh ko tira ye dil-jala
rab se magar hai ye dua kuchh na tira bura kare
vaqt ki aa.e din ki raaḌ ziist ki dam-ba-dam lataḌ
us pe ghamon ki chheḌ-chhaḌ koi na kyuun chiḌa kare
vasl ki bar na aa.e aas kar ke hazar iltimas
hijr men ho jo mahv-e-yas vo ye ghazal paḌha kare
Leave a Reply