Mohabbat Kar Ke Lakhon Ranj Jhele Bekali Pai

mohabbat kar ke lākhoñ rañj jhele bekalī paa.ī

vo mujh ko kyā mile ik maut goyā jīte-jī paa.ī

vo bulbul huuñ ki jis din se luTā hai āshiyāñ merā

uThā laayā maiñ apnā dil samajh kar jo kalī paa.ī

shikāyat us kī kyā tujh se ye apnī apnī qismat hai

ki merī aañkh ko aañsū mile tū ne hañsī paa.ī

jahāñ meñ vāqa.ī ‘muztar’ kā bhī ik dam ġhanīmat thā

magar afsos thoḌe din jiyā kam zindagī paa.ī

Leave a Comment