vo miri dost vo hamdard vo gham-khvar ankhen
ek maasum mohabbat ki gunahgar ankhen
shokh-o-shadab-o-hasin sada-o-purkar ankhen
mast-o-sarshar-o-javan be-khud-o-hoshiyar ankhen
tirchhi nazron men vo uljhi hui suraj ki kiran
apne duzdida isharon men giraftar ankhen
jumbish-e-abru-o-mizhgan kai khunuk saae men
atish-afroz junun-khez sharar-bar ankhen
kaifiyat dil ki sunati hui ek ek nigah
be-zaban ho ke bhi vo mail-e-guftar ankhen
mausam-e-gul men vo udte hue bhaunron ki tarah
ghuncha-e-dil pe vo karti hui yalghar ankhen
kabhi chhalki hui sharbat ke katoron ki tarah
aur kabhi zahr men duubi hui talvar ankhen
kabhi thahri hui yakh-basta ghamon ki jhilen
kabhi sahma hua simta hua ik pyaar ankhen
kabhi jhukte hue badal kabhi girti bijli
kabhi uthti hui amada-e-paikar ankhen
nok-e-abru men kabhi talkhi-e-inkar liye
kabhi ghole hue shirini-e-iqrar ankhen
aanch men apni javani ki sulagti chitvan
shabnam-e-ashk men dhoi hui gulnar ankhen
husn ke chand se mukhde pe chamakte taare
haae ankhen vo harif-e-lab-o-rukhsar ankhen
ishva-o-ghamza-o-andaz-o-ada par nazan
apne pindar-e-javani ki parastar ankhen
ruuh ko rog mohabbat ka laga deti hain
sehat-e-dil jo ata karti hain bimar ankhen
sehn-e-zindan men hai phir raat ke taron ka hujum
shama ki tarah farozan sar-e-divar ankhen
Leave a Reply