ḳhushbuon ki dasht se hamsa.egi taḌpa.egi
jis ko bhi hasil hui ye agahi taḌpa.egi
raushni ko gung hote jis ne dekha ho kabhi
kis havale se use tira-shabi taḌpa.egi
kaḌhta tha main hi sang-e-saḳht par resham se phuul
kya ḳhabar thi ye nazar sha.istagi taḌpa.egi
ḳhvab the payab is ka dukh nahin kab thi ḳhabar
mujh ko ta.abiron ki ik be-qamati taḌpa.egi
main na kahta tha ki sho.alon se na karna dosti
main na kahta tha ki ye dariya-dili taḌpa.egi
zaviya-dar-zaviya manzar badalte ja.enge
aankh saari aankh bhar ye zindagi taḌpa.egi
naghme chup hain aur rut bhi kah rahi hai chup raho
kis ko ab dil ki ye na-asudgi taḌpa.egi
aur ik din dasht badal se chura.enge nazar
aur mujh ko is ki ye be-ḳhangi taḌpa.egi
kuchh na kuchh ‘manzur’ dil se rabta rah ja.ega
us ko mujh se dosti ya dushmani taḌpa.egi
Leave a Reply