Muhammad Fiaz Hasrat
ho raha jo tum samjhe faisla ḳhuda ka hai
ye sila to insan ki apni hi ḳhata ka hai
lag ga.i vaba-e-be-e’tibari insan ko
pochhiye na mujh se haal ab ki jo dava ka hai
halat-e-dil-e-nadan kyon bigaḌti jaa.e hai
ab ki mujh pe saaya shayad kisi bala ka hai
ah-o-zari virani bebasi-o-nadari
ai ḳhuda ye haal ab kyon banda-e-ḳhuda ka hai
ab rahi diyanat-dari na hi vafadari
log kahte hain bas ye mas.ala vafa ka hai
zulm ki taraf-dari aise kyon kare koi
maan lijiye saara mas.ala ana ka hai
bujh ga.e charagh aḳhir kyon pata chala ‘hasrat’
ye qusur saare ka saara bas hava ka hai
Leave a Reply