afzal-ahmad-syed

Samundar Ne Tum Se Kya Kaha

samundar ne tum se kya kaha

istighasa ke vakil ne tum se puchha

aur tum rone lagin

janab-e-ali ye saval ghair-zaruri hai

safai ke vakil ne tumhare aansu ponchhte hue kaha

adalat ne tumhare vakil ka e’tiraz

aur tumhare aansu mustarad kar diye

aansu record-rōm men chale gae

aur tum apni kothari men

ye shahr sat.h-e-samandar se niche abad hai

ye adalaten shahr ki satah se bhi niche

aur zer-e-samaat mulzimon ki kothriyan

in se bhi niche

kothri men koi tumhen resham ki ek Dor de jaata hai

tum har peshi tak ek shaal bun leti ho

aur adalat barkhast ho jaane ke baad

use udhed deti ho

ye Dor tumhen kahan se mili

suprentendent of prisons tum se puchhta hai

ye Dor ek shakhs laaya tha

apne paanv men bandh kar

ek bala ko khatm karne ke liye

ek pur-pech raste se guzarne ke liye

vo aadmi ab kahan hai

thanDe paani men tumhen ghota de kar puchha jaata hai

vo aadmi rasta kho baitha

samundar ne tum se yahi kaha tha

More Poems

Leave a Comment