Band Kamra

dekho pardon ko achchhi tarah khinch duur

aur sab khidkiyan band kar do

aur us band kamre se bahar niklo

us men bosida sofon pe ik mota kapda chadha kar

tum ne un ko is andaz se rakh diya hai

ki ab daaen kone men

ukhdi safedi pe silan ke dhabbe

kam-o-besh nazron se poshida hain

aur baaen taraf

tuute Dibbon

purane khaton

zang-alud tuuti paleton

aur bosida pinjron ke ik Dher ko

tum ne ik lambi chaudi si chadar se

achchhi tarah Dhak diya hai

aur ab baaqi kamra

bada saf-suthra nazar aa raha hai

dekho tuuti hui carnas ko bhi

ik shokh kapde se Dhak kar

us par vo zar-shamen jala do

ki jin ki sisakti hui raushni men

tumhare khad-o-khal maalum hote hain mauzun

aur kone men rakhe hue

chhote recordplayer par hava disk rakh do

ki jis men purani si ek lai men

bas chand lafzon ki takrar hai

dekho us band kamre se bahar na niklo

kabhi bhuul kar bhi

barabar ke kamre men hargiz na jaao

kyuun ki vo sal-ha-sal se band hai

ye bhi mumkin hai

zahrile kide-makode vahan pal rahe hon

ye bhi mumkin hai

ab tak vo bhuton ka ghar ban chuka hai

dekho us band kamre se bahar na niklo

kyuun ki mumkin hai ab tak

vo zakhmi barahna band

baagh ke ek goshe men dam todte hon

haan agar ho sake to kisi se kaho

un ke khun-gashta jismon pe

zartar lafzon ki poshak Dhak kar

un ko bahar padi kursiyon par bitha de

ta ki us raah se koi guzre

to kah de ki sab thiik hai

tum magar phir bhi sab khidkiyan band rakho

aur pardon ko achchhi tarah khinch do

aur us band kamre se bahar na niklo

dekho us band kamre se bahar na niklo

Leave a Comment