Kunwar Mahendra Singh Bedi Sahar
karo jo chaho ham se puchhna kya
hamari aarzu kya mudda.a kya
samajh ka pher hai achchha bura sab
jo sach puchho to achchha kya bura kya
karen sajda faqat ham bahr-sajda
nahin manzur banda kya ḳhuda kya
jise mil jaa.e tere gham ki daulat
gham-e-duniya se us ko vasta kya
aizzah kyuun sar-e-balin hain ḳhamosh
mariz-e-gham abhi se so gaya kya
mare jaate hain ham ḳhauf-e-fana se
na ho marna to jiine men bura kya
na jaane aaj kyuun bigḌe hue ho
kisi ne kaan men kuchh kah diya kya
na jiina haath men apne na marna
bashar ki ibtida kya intiha kya
sitam dekho mujhi se puchhte hain
nasib-e-dushmanan kuchh ho gaya kya
hamara kaam hai ghuT ghuT ke marna
vahi jaane jafa kya hai vafa kya
sar-e-mimbar koi ja kar to dekhe
abhi tak hai dar-e-mai-ḳhana va kya
vo vaqt-e-sub.h ruḳhsat ho rahe hain
yahi hai sham-e-gham ki ibtida kya
but-e-kafir se ulfat hai ‘sahar’ ko
vahi jaane ki but kya hai ḳhuda kya
Leave a Reply