ishq men ḳhud-sari nahin hoti
husn men bandagi nahin hoti
navak-afgan bata to de aḳhir
dard men kyuun kami nahin hoti
raz-e-ulfat kahan chhupa.en ham
dil se bhi dushmani nahin hoti
vo mohabbat bhi kya mohabbat hai
jis men divangi nahin hoti
aah kar ke bhi ham ne dekh liya
soz-e-gham men kami nahin hoti
mast ankhon hi se pila saaqi
jaam se be-ḳhudi nahin hoti
jab kabhi samne vo aate hain
ham se ik baat bhi nahin hoti
kya karen aise gham ko ham le kar
jis men un ki ḳhushi nahin hoti
kaisi taqdir hai hamari ‘vaqar’
gham hi gham hain ḳhushi nahin hoti
Leave a Reply