ihanat-e-dil-e-sabr-azma nahin karte
buland ham bhi ye dast-e-dua nahin karte
sar ahl-e-ishq ke aksar jhuka nahin karte
agar jhuke bhi kahin phir utha nahin karte
vo baat un ki nigahen batae deti hain
jise vo apni zaban se ada nahin karte
dalil-e-tabish-e-iman hai kufr ka ehsas
charagh shaam se pahle jala nahin karte
umiid ahd-e-vafa aur un buton se ‘shakil’
jo bhuul kar bhi kisi se vafa nahin karte
Leave a Reply