ham ishq siva kam hain kisi naam se vaqif
na kufr ke mahram hain na islam se vaqif
talqin kare arz-e-tamanna hamen us se
mahram nahin hai us but-e-khud-kam se vaqif
vo daur-e-visal aah kidhar hai ki ham aur vo
duniya men na the nama-o-paigham se vaqif
kya puchho ho ham ravish-e-bagh-o-chaman ko
ham to rahe kunj-e-qafas-o-dam se vaqif
shirini-e-bosa se mazaq us ka ho phir talkh
ashiq jo hua lazzat-e-dushnam se vaqif
bad-nam na kar ishq ko ja kaam kar apna
hai ahl-e-havas tu nahin is kaam se vaqif
aghaz-e-mohabbat ke maze ne kiya ghafil
ab tak na the ham us ke bad-anjam se vaqif
Leave a Reply