salam mere rafiqon ko ham-nashinon ko
sapat chehron ko be-mehr-o-lutf sinon ko
koi habib-e-masarrat na koi munis-e-gham
na dil men josh na yara-e-dard sinon ko
koi farogh na koi numu ki yaron ne
rakha hai kar ke musattah tamam zinon ko
mila na haif! ghul-arai ka mizaj kabhi
mire khulus ke ”khirman ke khosha-chinon ko”
falak ne zinat-e-nisyan bana ke chhod diya
rusum-e-lutf ko dil-jui ke qarinon ko
gharaz ki tund havaon ne kar diya banjar
vafa ki kisht ko isar ki zaminon ko
shikasta kar diya badli nazar ke tufan ne
khud-e’timadi ke dhale hue safinon ko
nazar men kaj-nigahi lab pe maslahat-goi
khutut-e-rukh ne ubhara hai dil ke kinon ko
khilaf-e-vazaa ho bhule se gar ye sher-e-‘anis’
sunae ‘saz’ koi mere ham-nashinon ko
”khayal-e-khatir-e-ahbab chahiye har dam!
‘anis’ thes na lag jaae abginon ko!
Leave a Reply