Aks Koi Kisi Manzar Mein Na Tha

aks koī kisī manzar meñ na thā

koī bhī chehra kisī dar meñ na thā

sub.h ik buuñd ghaTāoñ meñ na thī

chāñd bhī shab ko samundar meñ na thā

koī jhankār rag-e-gul meñ na thī

ḳhvāb koī kisī patthar meñ na thā

sham.a raushan kisī khiḌkī meñ na thī

muntazir koī kisī ghar meñ na thā

koī vahshat bhī mire dil meñ na thī

koī saudā bhī mire sar meñ na thā

thī na lazzat suḳhan-e-avval meñ

zā.iqa harf-e-mukarrar meñ na thā

pyaas kī dhund bhī hoñToñ pe na thī

os kā qatra bhī sāġhar meñ na thā

Leave a Comment