sirf ankhen thiin abhi un men ishare nahin the
dil pe mausam ye mohabbat ne utare nahin the
jaisi raton men safar ham ne kiya tha aghaz
sar-ba-sar samten hi samten thiin sitare nahin the
ab to har shaḳhs ki ḳhatir hui matlub hamen
ham kisi ke bhi nahin the jo tumhare nahin the
jab hamen koi tavaqqo hi nahin thi tum se
aise us vaqt bhi halat hamare nahin the
mohlat-e-umr men rahne diye us ne shamil
jo shab o roz kabhi ham ne guzare nahin the
jab nazare the to ankhon ko nahin thi parva
ab inhi ankhon ne chaha to nazare nahin the
Duub hi jaana muqaddar tha hamara ki vahan
jis taraf dekhiye paani tha kinare nahin the
kyuun nahin ishq bhala har-kas-o-na-kas ka shi.ar
is tijarat men agar itne ḳhasare nahin the
Thiik hai koi madad ko nahin pahuncha lekin
ye bhi sach hai ki ‘zafar’ ham bhi pukare nahin the
Leave a Reply