Majid Ul Baqri
xye zor-o-shor sar-e-abshar kaisa hai
ḳhamosh kab se hai ye kohsar kaisa hai
koi hai aur bhi aa.ega jo usi jaisa
vo aa chuka hai magar intizar kaisa hai
jo chahte hain kisi ko yahan na aane den
batao shahr-e-talab men hisar kaisa hai
ye kaisi shaḳh ke paivand hain daraḳhton par
ye kaise phal hain ye rang-e-bahar kaisa hai
hamesha soch se kam hi raha hai har hasil
ḳhayal-o-ḳhvab ka ye intishar kaisa hai
kisi bhi ghar men vo pahli mohabbat hai hi nahin
koi bhi kahta nahin ye dayar kaisa hai
har ek lafz ke ma.ani badal ga.e ‘majid’
jahan-e-sher men ye ḳhalfashar kaisa hai
Leave a Reply