Suhaib Farooqui
ai dil-e-nadan tujhe samjha.en kya
arzu-e-vasl men mar jaa.en kya
ek raushan dil hamare paas hai
ham andheron se bhala ghabra.in kya
jab safar ki koi bhi manzil nahin
ham bhi ḳhak-e-rahguzar ban jaa.en kya
kya karen jab khet chiḌiyan chug ga.iin
ab agar pachhta.en to pachhta.en kya
bevafa ko ba-vafa kahne lagen
ishq ki rasm-e-kohan jhuTla.en kya
zindagi ḳha.if hai ḳhud hi maut se
zindagi ke naam par itra.en kya
tabsire duniya badal sakte nahin
tabsire halat par farma.en kya
ḳhamushi jin ka muqaddar hai ‘suhaib’
un zabanon ki sada ban jaa.en kya
Leave a Reply