mayus-e-azal huun ye maana nakam-e-tamanna rahna hai
jaate ho kahan ruḳh pher ke tum mujh ko to abhi kuchh kahna hai
khinchenge vahan phir sard aahen ankhon se lahu phir bahna hai
afsana kaha tha jo ham ne dohra ke vahin tak kahna hai
dushvar bahut ye manzil thi mar miT ke tah-e-turbat pahunche
har qaid se ham azad hue duniya se alag ab rahna hai
rakhta hai qadam is kucha men zarre hain qayamat-za jis ke
anjam-e-vafa hai nazron men aghaz hi se dukh sahna hai
ai paik-e-ajal tere hathon azad-e-ta.alluq ruuh hui
ta-hashr badal sakta hi nahin ham ne vo libas ab pahna hai
ai girya-e-ḳhun tasir dikha ai josh-e-fughan kuchh himmat kar
rangin ho kisi ka daman bhi ashkon ka yahan tak bahna hai
apna hi saval ai ‘dil’ hai javab is bazm men aḳhir kya kahiye
kahna hai vahi jo sunna hai sunna hai vahi jo kahna hai
Leave a Reply