bas-ki dushvar hai us shaḳhs ka chehra likhna
varna mushkil to nahin koi sarapa likhna
ye bhi mumkin hai ki tahrir badal di jaa.e
dosto apna bayan ḳhuun se puḳhta likhna
kuchh hamen sair-o-tamasha se nahin dilchaspi
shaghl bas apna hai tanha.i men paḌhna likhna
dil ka darvaza tumhare liye va rakkhenge
lauT aane ka kabhi ho jo irada likhna
bhej to sakte ho tum likh ke shikayat un ko
shart bas ye hai ki koi lafz na chubhta likhna
log asnad ke kashkol liye phirte hain
kitna be-sud hai is daur men paḌhna likhna
kaise divane hain likhte hue thakte hi nahin
ek hi lafz ko sidha kabhi ulTa likhna
pas-e-tahzib to kuchh pas-e-qalam hai ham ko
varna aata hai hamen jaise ko taisa likhna
log jab likh ke siyah kar ga.e divaren tak
kaun paḌhta hai bhala ret pe mera likhna
sar men sauda tha ajab likh gaya us ko kya kuchh
dil ne samjhaya bahut tha ki na aisa likhna
yaad kya rakhta ki vo zud-faramosh bhi tha
main bhi kuchh bhuul gaya us ko taqaza likhna
likhte hi ja.enge ham un ko arize ‘mohsin’
vo paḌhen ya na paḌhen kaam hai apna likhna
Leave a Reply