Qurban Aatish
abhi dariya men tughyani bahut hai
sanbhal kar paaon rakh paani bahut hai
salamat hai yaqin ki shaḳh kaise
na.e mausam ko hairani bahut hai
chalo kuchh peḌ raste men uga.en
musafir ko pareshani bahut hai
samajhte hain kahan vo maslahat ko
na.i naslon men nadani bahut hai
mire chehre pe dhundhlahaT hai lekin
kisi ka chehra nurani bahut hai
safar ka ma-hasal kya hoga ‘atish’
Dagar manzil ki anjani bahut hai
Leave a Reply