Nashtar Khaanqahi
shajar angan ka jab suraj se larzan hone lagta tha
koi saaya mire ghar ka nigahban hone lagta tha
tasalli dene lagti thiin mujhe juz-bandiyan us ki
main jab ik ik varaq ho kar pareshan hone lagta tha
sahar jis ki munajaton se thi raten tahajjud se
main us ki paak sohbat men musalman hone lagta tha
dua paḌh kar miri maan jab mire siine pe dam karti
aqidat ke andheron men charaghan hone lagta tha
purane peḌ phir taaza phalon se ladne lagte the
ga.e mausam se dil jab bhi gurezan hone lagta tha
chunauti dene lagti thiin na.i dushvariyan mujh ko
safar jab zindagi ka mujh pe asan hone lagta tha
bata.un kya ki kaisa ba-muravvat shaḳhs tha vo bhi
mujhe ilzam de kar ḳhud pasheman hone lagta tha
Leave a Reply