dil diya hai ham ne bhi vo mah-e-kamil dekh kar
zard ho jaati hai jis ko sham-e-mahfil dekh kar
tere aariz pe ye nuqta bhi hai kitna intiḳhab
ho gaya raushan tire ruḳhsar ka til dekh kar
qatl karna be-gunahon ka koi asan hai
ḳhushk qatil ka lahu hai ḳhun-e-bismil dekh kar
balliyon fart-e-masarrat se uchhal jaata hai dil
bahr-e-gham men duur se daman-e-sahil dekh kar
a.ine ne kar diya yakta.i ka daava ghalat
naqsh-e-hairat ban ga.e apna muqabil dekh kar
dekh to len dil men tere ghar bhi kar sakte hain ham
dil to ham denge tujhe lekin tira dil dekh kar
dekhiye rah-e-adam men aur pesh aata hai kya
hosh parran ho rahe hain pahli manzil dekh kar
arzu-e-hur kya ho ‘naz’ dil de kar unhen
sham.a par kya aankh Dalen mah-e-kamil dekh kar
Leave a Reply