Hasan Naim
mila na kaam koi umr-bhar junun ke siva
tamam aish mayassar rahe sukun ke siva
lagi vo aag ki divar-o-dar bhi chal nikle
koi muqim nahin ghar men ab sutun ke siva
main us ke jism ki bekal pukar sun bhi chuka
ab us ki aankh men rakkha hai kya fusun ke siva
paḌi vo dhuup ki sab rang paḌ ga.e piile
bacha nahin hai koi surḳh mere ḳhuun ke siva
tamam fan ki bina madd-o-jazr dil hai ‘na.im’
ki sher-o-naghma men kya mauj-e-andrun ke siva
Leave a Reply