Nushur Wahidi
tez-tar lahja-e-guftar kiya hai ham ne
barg-e-gul ko kabhi talvar kiya hai ham ne
sho.la-e-tegh ko aghosh-e-nazar men le kar
ziist men maut ko bhi pyaar kiya hai ham ne
kitne mansuron ka ḳhuun de ke tire kuche men
ehtiram-e-rasan-o-dar kiya hai ham ne
mai-kade valon ko saaqi ka havala de kar
ek avaz pe hushiyar kiya hai ham ne
ghair ke ḳhaam iradon ko kiya hai paspa
azm ko ahani divar kiya hai ham ne
amn kahte hain jise ruuh hai azadi ki
ek aalam ko ḳhabar-dar kiya hai ham ne
ghair ko pahle hi pahchan liya tha lekin
hosh men aane ko ik vaar kiya hai ham ne
ḳhuun ke daagh chaTanon pe jo paa.e hain ‘nushur’
chuum kar lala-e-kuhsar kiya hai ham ne
Leave a Reply