kuchh hunar aur samajhte hain na fan jante hain
ham tire zikr ko shayan-e-suḳhan jante hain
ruuh ki ghayat-e-ulvi ka na ho andaza
ham magar maqsad-e-taḳhliq-e-badan jante hain
isti.are hain tire ariz-o-chashm-o-lab ke
ye hadis-e-gul-o-shahla-o-saman jante hain
ye alag baat nahin aa.i zamana-sazi
ham magar ḳhuub zamane ka chalan jante hain
raqs zanjir ke ahang pe hota hai siva
ramz lekin ye kahan zamzama-zan jante hain
baghban bhi hai tasarruf men sharik-e-gulchin
is haqiqat ko koi ahl-e-chaman jante hain
lafz-o-taḳh.il ko jo kar na sake ham-ahang
‘shaukat’ us shaḳhs ko ham farigh-e-fan jante hain
Leave a Reply