Sahir Hoshiyarpuri
vo jis ko ham ne apnaya bahut hai
usi ne dil ko taḌpaya bahut hai
hamare qatl ki sazish ke darpai
hamara nek ham-saya bahut hai
dil-e-dard-ashna shauq-e-shahadat
mohabbat men ye sarmaya bahut hai
ajab shai hai chaman-zar-e-tamanna
samar koi nahin saaya bahut hai
ḳhata us ki nahin dil ko hamin ne
tamannaon men uljhaya bahut hai
ḳhuda mahfuz rakhe asman ko
zamin ko is ne jhulsaya bahut hai
tiri yaad aa.i hai to aaj ham ko
dil-e-gum-gashta yaad aaya bahut hai
ba-nam-e-hazrat-e-naseh bhi ik jaam
ki us ne va.az farmaya bahut hai
na kyuun Thukra.en ham duniya ko ‘sahir’
hamen bhi us ne Thukraya bahut hai
Leave a Reply