baḌh gaya kuchh aur dil ka iztirab
kya sitam hai ai nigah-e-baryab
ban ga.i bujhte tabassum ka sharar
vo dam-e-ruḳhsat tiri chashm-e-pur-ab
ai ḳhusha vo dil ki jis ki har ḳhalish
hai mujassam kuchh sukun kuchh iztirab
raat ki ninden huiin jin se haram
dekhta huun un hasin raton ke ḳhvab
be-piye rahta tha jab har dam surur
haa.e vo sarmasti-e-ahd-e-shabab
nashsha-e-dil se lahakta tha chaman
asmanon se barasti thi sharab
mauj-e-naghma ban ga.i thi zindagi
baj rahe the dil men ta.us-o-raubab
mahtab-e-shauq hamrah-e-safar
aftab-e-kamrani ham-rikab
vo nigahon men qayamat ka sukun
vo dhaḌakte dil men hashr-e-iztirab
muddaten guzrin magar ab tak ‘jamal’
yaad hai vo jagti ankhon ka ḳhvab
Leave a Reply