Mohammad Ismail Aasi Aarwi
dayar-e-ishq men vaa.iz ḳhirad ka kaam nahin
udhar na bhuul ke jaana vo rah-e-am nahin
vo sub.h sub.h nahin hai vo shaam shaam nahin
ki jis men un ki taraf se koi payam nahin
vo rah-rau huun ki manzil nahin qayam nahin
talash-e-dost men kuchh qaid-e-sub.h-o-sham nahin
ye kaif-e-ishq hai vaqti surur-e-jam nahin
tiri tarah mira naseh ḳhayal ḳhaam nahin
nigah-e-qahr ka markaz tha kaun mahfil men
huzur kahte hain tera koi maqam nahin
ye falsafa ye siyasat ye hikmat-o-danish
kahan kahan miri ḳhatir kamand-o-dam nahin
vo dars dete hain aḳhlaq ka ab ai ‘asi’
salam kijiye jin ko to len salam nahin
Leave a Reply