kuchh be-tartib sitaron ko palkon ne kiya tasḳhir to kya
vo shaḳhs nazar bhar ruk na saka ehsas tha daman-gir to kya
kuchh bante miTte da.ere se ik shakl hazaron tasviren
sab naqsh o nigar uruuj pe the ankhen thiin zaval-pazir to kya
ḳhush huun ki kisi ki mahfil men arzan thi mata-e-bedari
ab ankhen hain be-ḳhvab to kya ab ḳhvab hain be-tabir to kya
ḳhvahish ke musafir to ab tak tariki-e-jan men chalte hain
ik dil ke nihan-ḳhane men kahin jalti hai sham-e-zamir to kya
sahra-e-tamanna men jis ke jiine ka javaz hi jhonke hon
us ret ke zarron ne mil kar ik naam kiya tahrir to kya
likhta huun to poron se dil tak ik chandni si chha jaati hai
‘qasir’ vo hilal-e-harf kabhi ho paa.e na mah-e-munir to kya
Leave a Reply