na mandir men sanam hote na masjid men ḳhuda hota
hamin se ye tamasha hai na ham hote to kya hota
na aisi manzilen hotin na aisa rasta hota
sambhal kar ham zara chalte to aalam zer-e-pa hota
ghaTa chhati bahar aati tumhara tazkira hota
phir us ke ba.ad gul khilte ke zaḳhm-e-dil hara hota
zamane ko to bas mashq-e-sitam se lutf lena hai
nishane par na ham hote to koi dusra hota
tire shan-e-karam ki laaj rakh li gham ke maron ne
na hota gham to is duniya men har banda ḳhuda hota
musibat ban ga.e hain ab to ye sanson ke do tinke
jala tha jab to puura ashiyana jal gaya hota
hamen to Dubna hi tha ye hasrat rah ga.i dil men
kinare aap hote aur safina Dubta hota
are-o jite-ji dard-e-juda.i dene vaale sun
tujhe ham sabr kar lete agar mar ke juda hota
bula kar tum ne mahfil men hamen ghairon se uThvaya
hamin ḳhud uTh ga.e hote ishara kar diya hota
tire ahbab tujh se mil ke phir mayus lauT aa.e
tujhe ‘naushad’ kaisi chup lagi kuchh to kaha hota
Leave a Reply