Ahmad Zafar
aur kya mere liye arsa-e-mahshar hoga
main shajar hunga tire haath men patthar hoga
yuun bhi guzrengi tire hijr men raten meri
chand bhi jaise mire siine men khanjar hoga
zindagi kya hai kai baar ye socha main ne
khvab se pahle kisi khvab ka manzar hoga
haath phailae hue shaam jahan aaegi
band hota hua darvaza-e-khavar hoga
main kisi paas ke sahra men bikhar jaunga
tu kisi daur ke sahil ka samundar hoga
vo mira shahr nahin shahr-e-khamoshan ki tarah
jis men har shakhs ka marna hi muqaddar hoga
kaun dubega kise paar utarna hai ‘zafar’
faisla vaqt ke dariya men utar kar hoga
Leave a Reply